Misirin aparıcı mediya nümayəndələrinə Səfirlikdə iftar süfrəsi təşkil edildi
10 Aprel tarixində Misirin aparıcı mediya nümayəndələrinə Səfirlikdə iftar süfrəsi təşkil olunmuşdur. Misirin aparıcı 12 mətbuat orqanının nümayəndələrinin iştirakı ilə keçən tədbirdə səfir Elxan Poluxov bu ilin yanvar ayında Misir Ərəb Respublikası Prezidenti cənab Əbdülfəttah əs-Sisinin Azərbaycan Respublikasına səfərini və bu səfərin Azərbaycan-Misir əlaqələrinin inkişafına töhfə verdiyini qeyd etdi. həmçinin ölkəmizin İslam dünyasındakı yerindən, o cümlədən cari il ərzində Ulu Öndər Heydər Əliyevin anadan olmasının 100 illiyinə həsr edilmiş silsiləli tədbirlərin keçiriləcəyindən bəhs etdi. Ölkələr arasında münasibətlərin möhkəmləndirilməsi və inkişafında kütləvi informasiya vasitələrinin aparıcı rol daşıdığını qeyd edən səfir, jurnalistlərin buna öz müsbət töhfələrini vermələrinə çağırdı.
Misir mətbuat nümayəndələrinin bir qisminin Azərbaycana səfər etdiyini xatırlayan Elxan Poluxov belə səfərlərin gələcəkdə də davam etdiriləcəyini qeyd etdi.
Daha sonra tərəflər media sahəsində əlaqələrin genişləndirilməsi, ölkəmiz haqqında Misir ictimaiyyətinə daha geniş və ətraflı məlumatların çatdırılması istiqamətində əməkdaşlıq yolları və digər mövzular ətrafında müzakirələr apardılar.