Azərbaycanın səfiri nüfuzlu MENA agentliyinə iki ölkə arasında əlaqələrin inkişafından danışıb
Azərbaycanın Misirdəki səfiri Elxan Poluxov bu ölkənin rəsmi MENA agentliyinə müsahibə verib. AZƏRTAC xəbər verir ki, diplomatımız iki dost ölkə arasında əlaqələrin inkişafı və həyata keçiriləcək birgə layihələrdən söz açıb.
İqtisadi əməkdaşlığın perspektivlərindən bəhs edən səfir qeyd edib ki, Azərbaycan, Türkiyə və Gürcüstan arasında dəmir yolu Misir və Afrikanın digər ölkələrinin mallarının Mərkəzi Asiya və Çinə daşınmasında mühüm logistika marşrutu ola bilər. O diqqətə çatdırıb ki, ötən il iki ölkə arasında ticarət dövriyyəsinin həcmi 16 milyon dollar olub və bunun 13,6 milyon dolları Azərbaycanın ixracatının payına düşür. Eyni zamanda, 2021-ci ildə bu rəqəm daha yüksək – 42 milyon dollar təşkil edib. E.Poluxov vurğulayıb ki, bu ilin yanvarında Misir Prezidenti Əbdülfəttah Əs-Sisinin Bakıya səfəri zamanı Azərbaycan Prezidenti İlham Əliyevlə apardığı danışıqlar, müxtəlif sahələrdə əməkdaşlığın inkişafına dair imzalanmış sənədlər bu il və qarşıdakı dövrdə həmin göstəriciləri daha da yüksəltmək üçün geniş imkanlar açır. Bununla yanaşı, ötən ilin fevralında Bakıda keçirilən Birgə Hökumətlərarası Komissiyanın V iclasında, həmçinin bu çərçivədə təşkil olunmuş biznes forumda iqtisadi-ticarət əlaqələrinin daha da inkişafı üzrə mühüm sənədlər imzalanıb. İki ölkə arasında yaşıl enerji, şəhərsalma, kommunikasiya sahələrində də əməkdaşlığın geniş perspektivləri mövcuddur.
Azərbaycan və Misir arasında qədim tarixi bağların olduğunu qeyd edən səfir bildirib ki, hər iki tərəfdən yüzlərlə gənc Qahirədə və Bakıda təhsil alır, azərbaycanlı mütəxəssislər Misirdə çalışırlar. O, qarşılıqlı səfərlərin ikitərəfli əlaqələrin inkişafında mühüm rolunu vurğulayıb, bu ilin fevralında Azərbaycan Milli Məclisinin sədri Sahibə Qafarovanın səfərinin parlamentlər arasında əməkdaşlığa töhfə olacağını bildirib. Eyni zamanda, xarici işlər naziri Ceyhun Bayramovun Ərəb Liqasının Qahirədə təşkil etdiyi Qüdslə bağlı beynəlxalq konfransda iştirakı zamanı ərəb ölkələrindən olan həmkarları ilə görüşləri ölkəmizin ərəb dünyası ilə əlaqələrinin möhkəmlənməsinə xidmət edir.
Turizm sektorunda ölkələrimiz arasında əməkdaşlığa toxunan səfir qeyd edib ki, Bakı ilə Şarm əl-Şeyx şəhəri arasında birbaşa aviareyslər açılıb, habelə ötən il 3 minə yaxın azərbaycanlı istirahətini bu kurort şəhərində keçirib. Eyni zamanda, Azərbaycan və Misirin uyğun təşkilatları bu il qeyd edilən “Heydər Əliyev İli” çərçivəsində müxtəlif mədəniyyət və idman tədbirləri keçirəcəklər.